Rama konstruksiyasını alüminium monokokla əvəz edən hazırkı Land Rover Defender Discovery 5-in kifayət qədər yaxın qohumuna çevrilib və Slovakiyadakı eyni zavodda istehsal olunur. Bu, «Def»in özünə heç bir mane olmasa da, son il ərzində «Disko»nun satışları azalıb, halbuki son restaylinq vəziyyəti qismən düzəltməlidir.
Buna baxmayaraq, daxili rəqabət probleminin qlobal həlli bu modellərin fərqli arxitekturalara ayrılması olacaq. Automotive News Europe nəşrinin məlumatına görə, növbəti Discovery Electric Modular Architecture (EMA) platformasında qurulacaq – yeni Discovery Sport, Range Rover Evoque və Range Rover Velar modellərinin əsasını təşkil edəcək eyni platformada. Bu «araba» ilkin olaraq batareyalı maşınlar üçün hazırlanıb, lakin daxiliyanma mühərriklərindən istifadəyə də imkan verir. Yəni, çox güman ki, böyük «Disko» hibridə çevriləcək.
Öz növbəsində, Defender-in növbəti nəsli Modular Longitudal Architecture (MLA) üzərində qurulacaq. 2019-cu ildə bu şassi elan ediləndə «Jaguar» və «Land Rover» modellərinin böyük hissəsinin hibrid və ya tam elektrik güc qurğuları ilə təchiz olunaraq ona keçiriləcəyi güman edilirdi. Lakin layihə inkişaf etdikcə məlum oldu ki, MLA-nın elektrikləşdirmə baxımından imkanları kifayət qədər yaxşı deyil. Sonra isə ümumiyyətlə Jaguar-ın yalnız elektromobillər buraxacağı elan edildi, Land Rover üçün isə əsas platforma kimi yuxarıda adı çəkilən EMA göstərildi.
Son məlumatlara görə, «Defender»dən əlavə, MLA arxitekturasında yeni Range Rover və Range Rover Sport da qurulacaq. Bununla belə, «Def»in özü hələ çox təzədir: onun həyat tsikli qısaldılsa belə, nəsil dəyişənədək hazırkı ailənin ən azı daha bir üzvünü görəcəyik – 5,1 metrlik üçcərgəli Defender 130. Bundan əlavə, Mercedes-AMG G 63-ə meydan oxuyacaq «güclü» modifikasiya barədə yarımrəsmi söhbətlər gəzir.
Mənbə: Automotive News Europe
