Hyundai Tucson krossoverinin yeni nəsli üzərində iş çox fəal gedir: biz artıq dəfələrlə casus fotoları görmüşük, krossoverin premyerası isə şayiələrə görə avqusta təyin olunub. Bunun Kia Sportage-ə nə dəxli var? Məsələ ondadır ki, bu modellərin ümumi platforması var və, bir qayda olaraq, hər iki krossoverin yeni nəsillərinin nümayişi cəmi bir neçə ay fərqlə keçirilirdi.
Bu arada, Kia-nın həqiqətən Sportage-in yeni nəslini buraxılışa hazırladığına dair heç bir nəzərəçarpan iz hələ qeydə alınmır. Korean Car Blog nəşrinin müəllifləri iddia edirlər ki, Kia-Hyundai alyansının planlaşdırdığı digər yeniliklər plana uyğun olaraq işıq üzü görür, lakin Sportage-in nəsil dəyişikliyi 2021-ci ilə keçirilib – və hamısı onun görünüşü ilə bağlı fikir ayrılıqlarına görə.
Şirkət rəhbərliyinin bu məsələdəki diqqətliliyi əsaslıdır: Sportage Kia-nın ən çox tələb olunan modellərindən biri sayılır və firma, ola bilsin, hansısa radikal həllərlə alıcıları qorxutmaqdan çəkinir. Bəzi ehtimallara görə, krossoverin eksteryeri ətrafında yaranan münaqişə Lük Donkervolkenin alyansın dizayn üzrə vitse-prezidenti vəzifəsindən gözlənilməz gedişinin səbəblərindən biri olub. Bildiyimiz qədər, bu vəzifə hələ də boşdur.
Beləliklə, yeni Kia Sportage bazara yalnız gələn ilin ikinci yarısında çıxa bilər. Yeri gəlmişkən, gecikmənin daha bir səbəbi texnoloji xarakter daşıya bilər: şayiələrə görə, Kia bəzi ölkələrdə krossoverin uzunbazalı (və, ola bilsin, yeddiyerlik) versiyasını təqdim etməyi planlaşdırır. Belə krossover, məsələn, VW Tiguan Allspace ilə rəqabət apara bilərdi.
