Alman tüninq atelyesi Delta 4x4 yolsuzluq Porsche Cayenne qurub; sahibi Şeyn Ostuayzen bu avtomobillə Avstriya — Cənubi Afrika marşrutu üzrə yol getməyə hazırlaşır. Məhz bu səyahət üçün avtomobil asqı lift-dəsti, əlavə projektorlar və ehtiyat təkər üçün bərkidici alıb.
Crazy About Porsche saytına müsahibəsində Ostuayzen son bir neçə ildə sənaye və avtomobil dizaynı ilə məşğul olan böyük bir şirkətdə kreativ strateq kimi çalışdığını danışıb. Müqaviləsi başa çatdıqda isə o, doğma Keyptauna qeyri-adi bir yolla — lift edilmiş Porsche ilə bütün Afrika qitəsini keçərək qayıtmağa qərar verib. Maşının qurulmasında ona alman tüneri Delta 4x4 kömək edib.
Ostuayzenin yolsuzluq avtomobilinin əsasını təşkil edən birinci nəsil Porsche Cayenne krossoveri 2003-2010-cu illərdə istehsal olunub. Versiyadan asılı olaraq model 3,2-4,8 litrlik benzin mühərrikləri və ya 3.0 dizel mühərriki ilə təchiz edilirdi.
Layihənin detallarının işlənməsi və yolsuzluq avtomobilinin qurulması təxminən bir il çəkib. İlk növbədə «Cayenne» Front Runner baqajnikı ilə təchiz edilib; indi orada çadır, tent və iki 20 litrlik yanacaq kanistri saxlanılır. Daha sonra baqaj bölməsinə kilidlənən qutulardan ibarət orqanayzer quraşdırılıb, qapıya isə Mirack bərkidicisi vasitəsilə ehtiyat təkər asılıb.
Bundan əlavə, modernləşdirilmiş Porsche Cayenne PIAA projektorları və təkmilləşdirilmiş pnevmoballonlu qaldırılmış asqı alıb. Ostuayzenin sözlərinə görə, o, arabir sürətli magistrallardan kənara çıxmağı planlaşdırır və bu təkmilləşdirmələr çox faydalı ola bilər. Təxminən səyahət üç — dörd ay çəkəcək.
Bu ilin əvvəlində avstraliyalı Den Qrek 999 gün Afrikada necə səyahət etdiyini və bütün bu müddət ərzində Jeep Wrangler Rubicon-un damında quraşdırılmış çadırda yaşadığını danışıb. Onun maşınının təkmilləşdirmələr siyahısında American Expedition Vehicles asqı lift-dəsti (üstəgəl 63,5 millimetr), qoruyucu lövhələrlə gücləndirilmiş bamperlər, ehtiyat təkər üçün bərkidici, yüngül sintetik troslu Warn Zeon 10-S bucurqadı, reykalı domkrat və bir neçə əlavə işıqlandırma bloku var.
